Gintong Pamana Essay

Gintong Pamana: The Surigao Treasure
(Reaction Paper)
Ang Gintong Pamana ay isang dokumentaryong ginawa ng ABS-CBN at ito’y nagpapatunay na sa ating kasaysayan, tayo ay mayroon nang mayamang kultura kahit pa noong hindi pa nasasakop ng mga Español ang ating minamahal na Inang bayan. Ipinakita nila dito na ang ating mga ninuno ay mayayaman dahil sa napakarami nilang mga kagamitang yari sa ginto. Nakakamanghang isipin na ang kanilang mga gintong kagamitan ay maganda ang pagkakagawa kahit na wala pang makabagong teknolohiya sa kanilang panahon na makakatulong sa kanila na magawa ito nang walang kahirap-hirap. Dahil din sa tradisyon ng ating mga ninuno na kasamang ibinabaon ang kanilang mga ari-arian kapag sila ay namatay at dahil dito, marami tayong nalalaman tungkol sa ating kasaysayan.
Pero nakakalungkot isipin na ang isang napakahalagang bahagi ng ating kasaysayan ay ipinagbili sa kakarampot na halaga lamang at hindi man lang inisip kung gaano ito kahalaga para sa ating bansa at sa kasaysayan. Marami rin ang nanamantala sa taong nakahukay ng Surigao Treasure na si Edilberto Morales at ang nakakadismaya pa rito ay mismong alagad ng simbahan at mga opisyal ang nanamantala rito. Ipinakita rin na may ibang tao na ang kanilang pansariling kapakanan at kapakinabangan lamang ang iniisip at hindi ang pangkalahatan katulad na lamang nung sundalong kumuha sa dagger na kabilang sa mga nahukay.
Bakit nga ba tayo nagiging makasarili pagdating sa usaping yaman? Hindi ba’t mas nakakabuti kung ang ating iisipin ay ang ikabubuti ng lahat? Halimbawa na lamang ang nangyari kay Mang Berto na dahil sa kagustuhan nitong yumaman binenta niya ang nahukay na ginto. Pero anong nangyari? Mabilis rin itong nawala sa kanya. Halos wala na rin natira sa mga ari-ariang nabili niya matapos pagkaperahan ang mga gintong kanyang hinukay. Nakuha niya ng mabilis, nawala rin sa kanya ng mabilis.